هل سألت نفسك ليه الرئيس عبدالفتاح السيسي زار تركيا دلوقتي، وهل الهدف من الزيارة أبعاد سياسية زي توطيد العلاقات المصرية التركية، ولا ليها أبعاد اقتصادية كمان.. هنقولك كل التفاصيل في الفيديو ده.
في الساعات الأخيرة، الرئيس عبدالفتاح السيسي زار تركيا، والزيارة دي جت بعد ما الرئيس التركي رجب طيب أردوغان زار مصر من حوالي شهرين، فواضح كده إن مصر وتركيا داخلين على مرحلة مهمة جدا من تعزيز العلاقات.
وتعزيز العلاقات مش هيكون على صعيد السياسة بس، لأ ده هيشمل كمان الاقتصاد، بمعنى إن في مكاسب اقتصادية كتيرة من زيارة الريس لتركيا.
أول المكاسب دي، إن الزيارة دي تعتبر هي الزيارة الأولى للرئيس عبدالفتاح السيسي لتركيا من بداية توليه توليه حكم البلاد، وده حصل بعد التقارب الكبير في العلاقات بين مصر وتركيا.
وكمان، ضمن جدول الزيارة، عقد اجتماع المجلس الاستراتيجي رفيع المستوى للعلاقات بين البلدين، واللي تم تدشينه عند زيارة أردوغان للقاهرة .
وزيارة السيسي لتركيا شهدت توقيع عدد كتير من الاتفاقيات ومذكرات التفاهم في مجالات وقطاعات اقتصادية مختلفة، وده بجانب بحث الجانبين التعاون في مجال الغاز الطبيعي المسال وملف الطاقة بشكل عام.
ضيف على كده، إنه هيتم توسيع اتفاقية التجارة الحرة بين البلدين، وزيادة حجم التبادل التجاري واللي من المتوقع أن يصل إلى 15 مليار دولار في السنين الجاية، كمان متوقع أن يزيد حجم التعاون الاقتصادي والتجاري والاستثماري بين الدولتين لرقم قياسي.
والفترة الجاية هتشهد مزيد من تدفقات الاستثمارات التركية في مصر، وده لأن الاقتصاد المصري بيتمتع بمناخ جاذب للاستثمارات الأجنبية، والدليل على كده وجود مناطق اقتصادية كبيرة وبنية تحتية وتشريعية قوية ومشروعات عملاقة وأيدي عاملة وأراضي صناعية وسرعة في منح الرخصة الذهبية.
ضيف على كل كده، إن الزيارة هدفها تعزيز الشراكة الاستراتيجية بين القاهرة وأنقرة، ومعروف طبعا إن الدولتين عندهم اقتصاد كبير، فهيحصل نوع من التكامل الاقتصادي وهيعود بمكاسب اقتصادية كبيرة على البلدين، وهتفتح آفاق واسعة التعاون.
وكتير عارفين، إن مصر بتعتبر أكبر شريك تجاري لتركيا، من قارة أفريقيا، عشان حجم التبادل التجاري مع تركيا وصل خلال سنة 2023 ل 6.6 مليار دولار وفقا للإحصائيات الرسمية، والصادرات المصرية لتركيا هي كمان سجلت 3.8 مليار دولار، أما الواردات فبلغت نحو 2.8 مليار دولار.
والأكيد إن الزيارة هينتج عنها توقيع العديد من الاتفاقيات في مجالات الطاقة والتعليم والسياحة والصحة والثقافة والدفاع وغيرها، فهيزيد التعاون، لأن حجم الاستثمارات التركية في مصر تقدر بأكتر من 3 مليار دولار من خلال نحو 200 شركة تركية بتوفر خوالي 70 ألف فرصة عمل مباشرة و100 ألف فرصة عمل غير مباشرة .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
