الارز واحدة من الزراعات المهمة جدا في الدولة المصرية، وواحد من أهم السلع اللي أسعارها ارتفعت في مصر في الشهور اللي فاتت، وكان عليه مشاكل كتيرة... بس خلاص الدولة لقت الحل والأرز هيتزرع في مصر في الشتاء والصيف وهيكون متوفر وبأسعار أقل بكتير عند دلوقتي وكمان متوفر كميات كتيرة من المياة اللي بتحتاجها زراعة الأرز .. تعالوا نشوف إيه الحكاية في التقرير ده .
الارز واحد من الزراعات اللي معروف عنها انها بتستهلك وبتحتاج مياه كتيرة، واللي للاسف الدولة خلال السنين اللي فات أخدت قرارات بتحديد المساحات المزروعة بالارز بسبب أزمة النقص المائي اللي بدات تظهر في مصر، وعلشان كده في فترة من الفترات اخدت قرار باستيراد الارز من الخارج وده طبعا رفع فاتورة مصر الاستيرادية واللي طبعا بتكون بالدولار، وده طبعا جاي عكس اهداف الدولة واللي قايمة عليها حاليا وهيا تقليل الفاتورة الاستيرادية وزيادة الفاتورة التصديرية.
وطبعا زي ما احنا عارفين أن العالم كله دلوقتي بيمر بفترات وتغيرات جيوسياسية غيرت الخريطة بشكل كامل، وحاليا إستراتيجية الحكومة قائمة بشكل كامل علي تحقيق الإكتفاء الذاتي من كل الحاجات اللي بتستوردها، وعلشان كده كان لازم الدولة ممثلة في وزارة الزراعة استصلاح الأراضي والري تحط حد لأزمة نقص انتاج الأرز وكمان يكون الحل ده نوفر للمياة، علشان المياة تكفي وتغطي باقي الزراعات التانية وكمان تغطي التوسعات الجديدة في استصلاح الأراضي .
طيب اللي عملته مصر علشان تزود زراعة الأرز وكمان توفر في المياة ؟.
في الفترة الأخيرة وزارة الزراعة بالتعاون مع المركز القومي للبحوث تمكنوا من استنباط أو اختراع اصناف وأنواع جديدة لاغلب المحاصيل واهمها هو محصول الأرز واللي الوزارة بالتعاون مع المركز القومي للبحوث ، واخيرا وبعد 14 سنة من الأبحاث والدراسات الوزارة توصلت لصنف ارز عالي المقاومة لدرجات الحرارة والجفاف والملوحة والنوع ده اسمه ارز عرابي المقاوم للجفاف والملوحة .
النوع الجديد من الأرز المقاوم للجفاف والملوحة أقل في استهلاك المياة بنسبة 50% خصوصا أن استهلاك المياة في الأرز العادي بيوصل ل 7000 الف متر مكعب، ولكن الصنف الجديد من ارز عربي بيوصل استهلاكه 3500 الف متر مكعب بس وكمان مبكر النضج وبيقعد في الارض 120 يوم بس وانتاجيته بتزيد عن 4 مليون طن .
وزارة الزراعة واستصلاح الأراضي عملت لجنة باختبار صنف الأرز الجديد في محطة بحوث سخا اللي تعتبر معقل علماء الارز في مصر، والنتيجة كانت مفاجئة واثبتت أن المحصول الجديد ممكن زراعته وبكميات كبيرة جدا وبمعدل استهلاك مياة وعمر أقل بكتير من الأرز الطبيعي .
محصول الأرز الجديد بيكون الري له بمعدل مرة كل 12 يوم، وبمقارنة بسيطة مع أنواع الأرز الثانية اللي بتتزرع في مصر هتلاقيه بيكون الري بمعدل مرة مقابل 3 مرات خصوصا أن الأرز العادي بيحتاح للري كل 4 أيام بطريقة الغمر، بدأت تجربة زراعته في 300 فدان ووصلت الإنتاجية بتاعته ل 4 كن للفدان، في حين أن الإنتاجية العادية للفدان بتوصل ل 2.5 طن فقط في الظروف العادية .
