سنة 2005 تقريبا الدكتور يوسف بطرس غالي واللي كان وقتها بيشغل منصب وزير المالية كان طالع فى برنامج ولما المذيعة سألته عن إزاي بيتعامل مع المشاكل المالية فى الموازنة وغيرها من ماليات الدولة .. جاوب إجابة غريبة جدا .. إجابة بتكشف إزاي الراجل ده بيفكر وإزاي كان بيلاقي حلول لأي أزمة بتواجه.. يومها قال : «أنا ميكانيكي بتاع اقتصاد».. ولما المذيعة استغربت وقالته يعنى ايه “ميكانيكي اقتصاد ؟ رد وقالها: ”سمة الميكانيكي انه بيعرف يشتغل على أى نوع عربية تجيلوا الورشة باعتباره «صاحب صنعة» بيمارسها في أي مكان ومع أي موديل عربية.
وده بالظبط اللى بيميز يوسف بطرس غالى عن أى حد تانى قعد على كرسي وزير المالية .. فهو بيمتلك عقيلة منظمة وجايب الحكاية من تحت خالص واتعامل مع كل أنواع المشاكل المالية اللى بتعيشها مصر
بعد ثورة 25 يناير اضطر يوسف بطرس غالى الى مغادرة مصر بسبب الخوف من الحبس بعد بلاغات كتير اتقدمت ضده معظمها كان “فنكوش” مع الهوجة اللى طلعت بعد الثورة ضد كل رموز عصر الرئيس الراحل مبارك .. وقدر يوسف بعد كده يثبت براءته فى كل التهم اللى اتوجهت ليه .. ولما موقفه القانونى أصبح سليم 100% بدأت الدولة تستعين بخبراته وبمشورته والحقيقة عمره ما بخل على مصر وكطان حاضر دايما فى المعاد.
واختياره النهاردة عضو فى المجلس الاقتصادي التخصصي للتنمية الاقتصادية بقرار من الرئيس السيسي بيرد للراجل اعتباره وبيأكد كمان ان الدولة لا تقصي أحد وان الفيصل فى التعامل مع أى حد هو القانون.. ومينفعش يكون عندك عقليات بحجم وخبرة يوسف بطرس غالى وما تستفدتش منهم فى ايجاد حلول لكتير من المشاكل اللى بتحاصر الحكومة.
