مصر حاليا في تحدي صعب وهو توفير الطاقة خصوصا أن مصر بتصرف رقم ضخم علي استيراد الوقود اللي بتستخدمه في توليد الطاقة الكهربائية، بس مصر في الوقت الحالي مشيت في طريق جديد هيخليها في حته تانية في مجال انتاج الطاقة الكهربائية.. يا تري اية هو الطريق ده واية الخطوات اللي مصر هتعملها منه خليكم معانا للآخر وهتعرفوا التفاصيل
طبعا كلنا عشنا وشفنا الفترات الصعبة اللي مرت بيها البلد خلال السنة اللي فاتت واللي كانت الكهربا بتقطع فيها علي كل البيوت وفي كل المحافظات، وكانت البداية بقطع الكهرباء لمدة ساعة وبعدين زادت لساعتين وفي احيانا وصلت لـ3 ساعات وفي مناطق تانية من محافظات الجمهورية كانت بتوصل لأكثر من كده.
الفترات اللي مرت بيها مصر من قطع الكهرباء وحالة الغضب اللي كانت عند الناس دفعت الحكومة لتعويض نقص امدادات وقود تشغيل محطات توليد الكهرباء باستيراد الكميات اللي ناقصة من برا والحكومة دفعت علي مدار اقل من شهرين ما يقرب 1.180 مليار دولار علشان تأمن أمدادات محطات توليد الكهرباء، وحاليا القيمة دي ارتفعت لـ2.5 مليار دولار لتامين الوقود اللي هتستخدمه محطات توليد الكهرباء.
طيب هل الحكومة هتفضل تستورد وقود كده علي طول ولا اية الحلول المطروحة ؟.
في الوقت الحالي مصر شايفة أن الطاقة النظيفة هيا الحل السليم والبديل الأمن لتأمين توفير الطاقة لمصر وميبقاش في قطع للكهرباء تاني علي مدار السنين اللي جاية، خصوصا أنه طاقة مش هتخلص وكمان ببلاش ولا هتحتاج لوقود ولا هتحتاج اي اي حاجة هيا يا دوب عمليات الصيانة الدورية للمحطات وخلاص، وفعلا مصر حاليا بدأت في اكتر من موقع علشان تولد الطاقة من الشمس والرياح خصوصا في أسوان والغردقة والزعفرانه، والدولة مؤخرا خصصت حوالي 41 ألف كيلومتر مربع من الأراضي لتنفيذ مشروعات للطاقة المتجددة، ومصر عندها خطة للوصول بحجم قدرات الطاقة النظيفة اللي هتكون موجودة علي شبكة الكهرباء بنسبة 42% في سنة 2030.
مننساش كمان أن مصر عندها سابقة مهمة جدا في مجال انتاج الطاقة من الشمس وهيا محطة بنبان واللي بتعتبر واحدة من اكبر محطات توليد الكهرباء من طاقة الشمس في العالم وتم دخوله للخدمة في 2019، ومحطة بنبان بتعادل حاليا 90% من الكهرباء اللي بينتجها السد العالي، ومجمع بنبان بيضم 32 محطة شمسية بقدرة بتوصول لـ 1465 ميجاوات باستثمارات وصلت لأكثر من 2 مليار دولار، وبيوصل عدد ألواح الشمسية المستخدمة في مجمع بنبان لـ 200 ألف لوح شمسي.
المشروع العملاق اللي مصر عملته في منطقة بنبان في اسوان واللي بيقع علي مساحة 200 ألف متر مربع بمنطقة كوم امبو بمحافظة أسوان، كان بداية لخطوات مصر لدخول عالم الاستثمارات في الطاقة النظيفة خصوصا ان مصر في الوقت الحالي عندها استراتيجية انها تكون مركز اقليمي لتبادل الطاقة مع كل دول العالم، وفعلا مصر حاليا وقعت عقود لتوريد الطاقة لعدد كبير من الدول زي السعودية وقبرص والسودان ولبيبا وغيرها من الدولة، وبكده مصر هتكون مركز لتوليد وبيع وتبادل الطاقة مع كل قارات العالم خصوصا أن مصر من خلال الخطوط اللي هتعملها مع الدول دي هتقدر تمد خطوط تانية لدول كتيرة من كل قارات العالم .
