تامر حسني لمحمد سامي:"ربنا يوفقك في كل شغلك اللي جاي وتكسر الدنيا"

حرص الفنان تامر حسني على الرد على المنشور الذي كتبه المخرج محمد سامي له خلال الساعات الماضية معربا عن سعادته. 

رد تامر حسني على رسالة محمد سامي 

وعلق تامر حسني على منشور محمد سامي قائلا : "يا سامي يا حبيبي يابن الناس الطيبين شكراً من كل قلبي على كل حرف خارج من قلبك كتبته  في حقي ، خلتني أدمع يا سمسم " . 

وأضاف:"أولاً أنا صدقت موهبتك من و انت صغير سناً لإنك فعلاً موهوب موهبه مش عاديه وتاريخ نجاحاتك يشهد بكده ، كنت عارف وانا بقدمك إني بقدم مكسب حقيقي للصناعه و من يوم ماسجلت رقمك على تليفوني وهو مكتوب سامي إبني ، عشان كان إصراري على تقديمك كان بقلب أب مش صديق من سنك أب مصدق في إبنه و عارف إن الناس مش هيدوله فرصه يطلع عشان سنه صغير" . 

وتابع: "و الحمدلله برحلتك و رحلتي اثبتنا للدنيا إنها مش بالسن لأ،  بالمجهود و التعب و الشطاره و المذاكره و انت كل الصفات دي كانت فيك وانا لوحدي اللي عارف ، عشان كده صممت إن الدنيا كلها تعرف معايا حجم موهبتك الحقيقي ، حتى أعمالي  اللي من إخراجك ليها مكانه خاصه في قلوب الناس، مسلسل آدم، فيلم أهواك، فيلم تصبح على خير" . 

واختتم : "و لسه إن شاء الله نجاحات جايه مستنيانا مع بعض ، ربنا يوفقك يا حبيبي في كل شغلك اللي جاي و  تكسر الدنيا و في القمه زي عادتك ،، يا محمد شكراً تاني على البوست الصادق ده شكراً يا أصيل يا محترم  ، ربنا يخلينا دايماً لبعض ضهر و سند" . 

رسالة محمد سامي لتامر حسني 

نشر محمد سامي صورة تجمعه بتامر حسني على صفحته الرسمية عبر موقع تبادل الصور والفيديوهات "إنستجرام" وعلق قائلا : "ولا تنسوا الفضل بينكم، وأنا قاعد امبارح في التصوير افتكرت الرحلة والشقى والتعب من أول عمل لحد العمل اللي بصوره دلوقتي وافتكرت صعوبة الحصول على فرصة علشان الواحد يثبت نفسه ويحقق أحلامه" .

وأضاف : "فطبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي، تامر قدملي كل الدعم والحب والإمكانيات اللي خليتني أثبت نفسي وبالذات في وقت كان صعب الشباب ياخد في الدراما فرصة بحجم مسلسل آدم".

وتابع : "فاكر إن الكل كان رافض إني أخد الفرصة دي ومستكبرينها عليا إلا هو وقف في ضهري كأنه بيحارب لأخوه وبصلي مرة والظروف كلها ضدي وكنت حاسس وأنا بحضر إنهم هيجيبوا حد غيري وقالي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقولي مسلسلك كأني عامل تسع مسلسلات قبله تحسس الواحد بنفسه وأهميته" .

واختتم : "أشهد الله إنك طول عمرك متواضع ومؤدب وتطلب الحاجة باحترام، ومع الكرو محترم وعلشان كدة روحنا فيك، بحبك يا صاحبي وتستاهل كل حاجة حلوة يا أجمل قلب، ويارب يرزق كل الناس باللي يساعدهم على تحقيق أحلامهم زي ما رزقني بتامر حسني" .