ايه اللي حصل النهاردة في البنوك وايه قصة صفقة الموسم اللي بتمولها بنوك مصر وإزاي المصارف المصرية بقت تقود المشروعات القومية والخاصة الضخمة في البلد وإيه مدلول اللي حصل.. خليكم معانا وهنعرف كل التفاصيل.
معروف إن قطاع البنوك المصري من أعرق القطاعات الاقتصادية في المنطقة كلها ومصر عندها خبراء بنوك أكفأ من اللي في أوروبا وأمريكا واللي حصل في أزمة سوق الصرف والبنوك على مدار سنتين فاتوا بيقول إن عندنا مصرفيين على أعلى قدر من الحرفية والخبرة ودا اللي خلي قطاع البنوك يستفاد من الأزمة بدل ما يتأثر بيها وكل الارقام شاهدة إن قطاع البنوك في مصر بقي هو عمود عملية التنمية الاقتصادية وهو ضهر الشركات والمشروعات القومية في مصر وإنه ضهر مالي متين وقوي..
وعشان البنوك هي بتعتبر الممول الرئيسي لكتير من المشروعات الكبيرة والضخمة واللي الشركات ماتقدر تتحمل تكلفتها مرة واحد وبحتاج شريك مالي وممولين سمععنا عن صفقات كتير الفترة اللي فاتت بين البنوك والشركات وكان اخرها الصفقة اللي تمت من ساعات بين بنك مصر والبنك التجاري الدولي سي اي بي مصر وبين شركة سوديك لتمويل مشروع ضخم بقيمة 4.14 مليار جنيه.
بنك مصر دخل الصفقة بصفته المقرض والمرتب الرئيسي الأولي ومسوق التمويل ووكيل التمويل وبنك الحساب أما البنك التجاري الدولي فشارك في العملية بصفته المقرض والمرتب الرئيسي الأولي ومسوق التمويل ووكيل الضمان،
وحسب معلومات الصفقة الـ 4 مليار جنيه دول بيعتبرو تمويل جزئي للتكلفة الاستثمارية لمشروع عمراني ضخم بتنفذه شركة سوديك بمدينة الشيخ زايد الجديدة، ووقع عقد التمويل المشترك كبار قادة البنوك منهم محمد الإتربي رئيس مجلس إدارة بنك مصر، وعمرو الجنايني، نائب الرئيس التنفيذي والعضو المنتدب بالبنك التجاري الدولي، مع أيمن عامر مدير عام شركة سوديك، بحضور حسام الدين عبد الوهاب نائب رئيس مجلس إدارة بنك مصر.
المصرفي الكبير محمد الإتربي علق على الصفقة وقال إنها ثمرة التعاون بين بنك مصر والبنك التجاري الدولي، واللي أسفر عن إتمام التمويل بنجاح، وأشاد بالدور الحيوي اللي بيقوم بيه القطاع المصرفي المصري في دعم الاقتصاد القومي.. وقال الاتربي كمان إن مشاركة بنك مصر في تمويل المشروع استكمال لدوره الرائد في دعم الاقتصاد المصري خاصة وإن قطاع العقارات من أهم القطاعات المؤثرة في الاقتصاد المصري ودا لارتباطه بمجموعة كبيرة من الصناعات والأنشطة الوسيطة واللي بيحرص البنك على تمويلها لتوفير المزيد من فرص العمل.
أما المصرفي المخضرم عمرو الجنايني فأكد انفتاح البنك على تمويل المشروعات القومية الضخمة في كل المجالات الاقتصادية وأشاد بالتعاون مع سوديك واللي قال عنها إنها واحدة من الشركات الرائدة في قطاع التنمية العقارية..
الجنايني قال كمان إن استراتيجية البنك التجاري الدولي موجهة بشكل كبير لدعم المطورين العقاريين المميزين زي سوديك بما يتماشي مع استراتيجية الدولة في التوسع العمراني واللي بيعتبر أحد الأعمدة الرئيسية في الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
