إيه اللي بيحصل للدهب، وليه أسعارها بقت جنونية، كل يوم في ارتفاع، وايه أسباب الجنون ده، وهل ممكن أسعاره تنزل الفترة الجاية.. هنقولك كل التفاصيل في الفيديو ده.
أسعار الدهب في مصر في الفترة الأخيرة، بقت في ارتفاع كل يوم، وبالفعل حصلت قفزة جنونية لأسعار المعدن الأصفر عالميا، واتأثرت بيها السوق المحلية في مصر، لكنه حاليا بيتراجع بشكل بطيء بعد ما سجل ارتفاعات كبيرة.
وفي الساعات الأخيرة سعر الدهب في محلات الصاغة، سجل عيار 24 ، 3,977 جنيه للشراء و3,966 جنيه للبيع .
أما عيار 21 فسجل هو كمان 3,480 جنيه للشراء و 3,470 جنيه للبيع، وده حصل بعد ما كان مسجل 4050 جنيه أول امبارح، وعيار 18 في التوقيت ده كان مسجل زيادة كبيرة وصلت ل 3500 جنيه بدون مصنعية...و عيار 18 سجل انهاردة، 2,983 جنيه للشراء و 2,974 جنيه للبيع، أما عيار 14، فسعره كان 2,320 جنيه للشراء.
طب وبالنسبة للجنيه الدهب؟
طبعا ناس كتير بتشتري الجنيه الدهب لأنه بيحفظ الفلوس وكمان معلهوش مصنعية كبيرة زي المشغولات، فأغلب اللي عايز يستثمر في الدهب ببشترى الجنيه عشان يحفظ فلوسه ويجمدها من خلاله، عشان كده هو أفضل خيار، وسعر الجنيه عيار 24، قيمة 27,840 جنيه للشراء و 27,760 جنيه للبيع.
ونقدر نقول إن السبب الرئيسي فى ارتفاع أسعار الدهب في مصر هو زيادة القدرة الشرائية في فترة زمنية قصيرة، يعني تهافت الناس على الشراء في وقت واحد، وطبعا ده ساهم في إن الأسعار وصلت لقمة تاريخية ماوصلتش لها قبل كده. بخلاف طبعا الارتفاع العالمي المعدن النفيس لأسباب كتير وهو انعقاد اجتماع مجلس الاحتياطي الفيدرالي الأمريكي النهاردة وبكرة لبحث سعر الفايدة والاتجاه لخفضها ودا معناه ارتفاع كبير في سعر الدهب عالمياً واللي بيكون ليه تأثير مباشر على سعره في مصر.
وممكن جدا سوق الذهب في مصر يهدى، والأسعار ترجع تنخفص في حالة واحدة، وهي التريث وعدم شراء المعدن الأصفر في الوقت الحالي وهو في أعلى نقطة له، لكن مع التهافت على الشراء متوقع ان سعر جرام 21 يوصل 5 آلاف جنية سنة 2025.
عشان كده لو حضرتك عايز تشتري دهب، اختار الوقت المناسب واشتري، وبكده تقدر تضمن إن استثمرت فلوسك وأنت قاعد في بيتك.
ولو حضرتك هتنزل تشتري دلوقتي، فهنقولك شوية نصايح مهمة، واللي أهمها انك تتنقل بين تجار أو محلات كتير، وتسألهم عن الأسعار عشان تتجنب النصب، وكمان تسأل عن قيمة المصنعية، بعد كده اختار تاجر تثق فيه وسمعته حلوة في السوق عشان ماتتغشش.
ولما تيجي تختار، فحاول تشتري عيار21 لأنه الأقل مصنعية عند البيع، وياريت تبعد عن الفصوص.
ولو ناوي على الاستثمار أو الادخار، فمفيش قدامك غير السبايك والجنيهات الدهب فاشتري واتأكد من الختم اللي على الدهب كويس، وماتنساش الفاتورة الضريبية واللي عليها رقم السجل التجاري، والسيريال نمبر، ورقم البطاقة الضريبية للمحل، عشان تضمن حقك كويس.
